Xəzər rayonunda yeni Qadın Resurs Mərkəzinin açılışı olub

qhtxeber.az  Xəzər rayonunun Şüvəlan qəsəbəsində yeni Qadın Resurs Mərkəzinin açılışı olub. 
 
Mərasimdə BMT Baş katibinin köməkçisi və qurumun İnkişaf Proqramının (BMT İP) Avropa və MDB üzrə regional bürosunun direktoru Miryana Spolyariç Egger, Xəzər Rayon İcra Hakimiyyətinin başçısı Elşən Salahov, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, İsveçrə Əməkdaşlıq Ofisinin Cənubi Qafqaz üzrə regional direktorunun müavini, doktor Simona Haeberli və Milli Məclisin deputatı Rauf Əliyev iştirak ediblər.
 
qhtxeber.az-a daxil olan məlumata görə, Xəzər Rayon İcra Hakimiyyətinin başçısı Elşən Salahov çıxışında bildirib ki, Azərbaycan qadınının, eyni zamanda Xəzər rayonunda yaşayan qadınların sosial həyatının yaxşılaşdırılması istiqamətində çox mühüm addımlar atılır. Onun sözlərinə görə, Xəzər rayonunda 18 minə yaxın məcburi köçkün məskunlaşıb və onların da arasında olan qadınlar Qadın Resurs Mərkəzinə cəlb olunacaq. 
 
Miryana Spolyariç Egger qadın resurs mərkəzlərinin qadınların öz şəxsi hədəflərinə çatmaq və iqtisadi imkanlardan yararlanmaq üçün bir-birindən öyrənməsinə və bir-birlərinə dəstək göstərməsinə imkan verən bir ekosistem formalaşdırdığını vurğulayıb: “Mərkəzlər təkcə qadın sahibkarların öz şəxsi bizneslərini qurmasına dəstək göstərməyib, həm də onların özünəinam hissi qazanmasına, ailədə bərabərliyə nail olmasına, cəmiyyətdə nüfuzlarının artmasına və nəticədə başqaları üçün nümunə təşkil edən şəxslərə çevrilməsinə kömək edib”. 
 
O, Azərbaycan hökumətinə və inkişaf sahəsində fəaliyyət göstərən tərəfdaş təşkilatlara insanların həyatını əsaslı dərəcədə dəyişən bu vacib təşəbbüslərə göstərdikləri dəstəyə görə minnətdarlığını bildirib. 
 
S. Egger, həmçinin BMT-nin Gender Bərabərliyi və Qadınların Səlahiyyətlərinin Artırılması Qurumunun gender bərabərliyi və qadınların səlahiyyətlərinin artırılması sahəsində spesifik mandatının tanınması fonunda BMT agentliklərinin birlikdə işləyərək öz müqayisəli üstünlüklərini ortaya qoymasının vacibliyini də diqqətə çatdırıb. 
 
Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirib ki, 2011-ci ildə qadın resurs mərkəzlərinin yaradılmasına start veriləndən bəri 6000 nəfərdən yuxarı qadın mühasibat uçotu və maliyyə savadlılığı, informatika, maliyyələşmə üsulları, qadınların insan hüquqları və iqtisadi hüquqları, habelə tərcümeyi-halın yazılması, təqdimat bacarıqlarının gücləndirilməsi və şəbəkələşmə kimi sahələrdə pulsuz təlimlərdən yararlanıb. Təlimlər yüzlərlə qadını maddi təchizatla qrant dəstəyindən istifadə edərək öz bizneslərini qurmaqda kömək edib: “Bu gün ölkədə çox güclü dövlət-qadın siyasəti aparılır, xüsusilə də qadın sahibkarlığının inkişafi ilə bağlı böyük işlər görülür. Bu layihələrimizin əsas məqsədi qadının “iş axtaran” statusdan “iş yerləri yaradan” statusa keçməsi təşkil edir. Eyni zamanda qadının iqtisadi cəhətdən güclü olması onu bir sıra çətinliklərdən və risklərdən sığortalayır. Buna görə də qadınlarımızda özünəinam hissinin yaranması, peşə hazırlığı kurslarına cəlb olunması, sahibkarlıq fəaliyyəti haqqında bilik və təcrübə qazanmaları üçün xüsusi qurumlara ehtiyac vardır. Bu baxımdan, bizim beynəlxalq tərəfdaşlarımızla bərabər yaratdığımız qadın resurs mərkəzlərinin əhəmiyyəti böyükdür”. 
 
Simona Haberli qeyd edib ki, iqtisadi səlahiyyətləri artırılmış qadınlar öz ailələrinin təhsil və sağlamlığına çox müsbət təsir göstərir: “Çünki onlar çox zaman ailə resurslarını fərqli şəkildə xərcləməyə üstünlük verirlər. İsveçrə Azərbaycanda çoxsaylı məcburi köçkünlərin və etnik azlıqların yaşadıqları ərazilərdə daha çox qadın resurs mərkəzlərinin yaradılmasına dəstək göstərməkdən həqiqətən də məmnunluq duyur”. 
 
Tədbirdə vurğulanıb ki, İsveçrənin İnkişaf və Əməkdaşlıq Agentliyi və Avstriya İnkişaf Agentliyi tərəfindən maliyyələşdirilən və BMT İP-nin Azərbaycandakı Nümayəndəliyi tərəfindən həyata keçirilən 637 000 ABŞ dolları dəyərindəki yeni təşəbbüs çərçivəsində üç rayonda yaradılan üç qadın resurs mərkəzi 400-dən yuxarı qadının məşğulluq imkanlarını artıracaq bacarıqlar qazanmasına dəstək göstərəcək. Bu təşəbbüs BMT-nin Gender Bərabərliyi və Qadınların Səlahiyyətlərinin Artırılması Qurumunun və BMT İP-nin 2021-ci ilin iyul ayına qədər davam edəcək “Cənubi Qafqazda qadınların iqtisadi səlahiyyətlərinin artırılması” adlı birgə layihəsi çərçivəsində həyata keçirilir. Azərbaycanda bu layihə Ailə, Qadın və Uşaq Problemləri üzrə Dövlət Komitəsi ilə əməkdaşlıq yolu ilə BMTİP tərəfindən icra olunur. 
 
Qeyd olunub ki, bu təşəbbüsün cari il ərzində 70 qadının öz biznesini qurmasına kömək edəcəyi və 30-dan yuxarı qadının peşə hazırlığı kurslarına cəlb olunmasına kömək edəcəyi gözlənilir. Bununla yanaşı, bu il layihə çərçivəsində ölkədə iri və orta ölçülü 12 özəl şirkətlə əməkdaşlıq qurulacaq və bu şirkətlər 2000-dən artıq aparıcı biznes qurumunu bir araya gətirən BMT-nin “Qlobal Saziş” Şəbəkəsinə qoşulacaq. Qadınların layiqli əməyə çıxış imkanını artırmaq məqsədilə özəl şirkətlərin öz biznes strategiyalarına gender aspektlərini nəzərə alan korporativ siyasət və təcrübələri daxil etməsi üçün BMT-nin Gender Bərabərliyi və Qadınların Səlahiyyətlərinin Artırılması Qurumu ilə əməkdaşlıq çərçivəsində özəl şirkətlərin Qlobal Saziş Təşəbbüsünün Qadınların Səlahiyyətlərinin Artırılması Prinsiplərini qəbul etməsinə texniki dəstək göstəriləcək. Bu tədbir 2018-ci ilin dekabr ayında ictimaiyyətə təqdim olunmuş “Qadınlar özəl sektorda” adlı gender qiymətləndirməsi tədqiqatının nəticələrinə əsaslanır ki, bu tədqiqat da İsveçrə hökuməti tərəfindən maliyyələşdirilib.