+  -  Çap 

Milli Məclisin Insan Hüquqları Komitəsinin sədri Rəbiyyət Aslanovanın “525-ci qəzet”-ə müsahibəsi  


– Rəbiyyət xanım, bu yaxınlarda Qazaxıstanın Almatı şəhərində ATƏT Parlament Assambleyasının (PA) təşkil etdiyi tədbirdə iştirak etmisiniz. Tədbir zamanı Qarabağ probleminə və o cümlədən qondarma “DQR”də keçiriləcək seçkilərə toxunuldumu? 
 
– Bəli, toxunuldu. Bildiyiniz kimi, ermənilər bu qondarma və qeyri-qanuni seçkilərə ATƏT üzvlərini də dəvət edirlər. Fürsətdən istifadə edərək, ATƏT-in nümayəndələrinə dedim ki, bu nə qədər korrektidir ki, separatçı rejimin keçirdiyi seçkilərə dünyada hüquq dəyərlərini, hüquq prinsiplərini yüksək və insan haqlarını ali tutan dövlətlər, beynəlxalq təşkilatların nümayəndələri dəvət edilirlər. Mənə elə gəlir ki, bundan böyük anlaşılmazlıq yoxdur. Mən inanıram ki, Avropanın heç bir dövləti bu seçkiyə nə öz nümayəndəsini göndərəcək, nə də seçkini tanıyacaq. Bu, ümumiyyətlə, bütün beynləxalq təşkilatlarda, tədbirlərdə gündəmə gətirilməlidir. Azərbaycanın ərazi bütövlüyü təmin olunmayınca, orada heç bir seçki tanınmamalıdır. Nə qədər ki, bu ərazilər işğal altındadır, orada hər hansı qurum heç bir seçki keçirə bilməz. Orada heç bir təşkilat yarana bilməz. Çünki bu, mənim ölkəmin ərazisidir. Özü də bu gün işğal altında olan ərazisidir. Odur ki, kimlərinsə orada öz fəaliyyətini gerçəkləşdirmək imkanı olmamalıdır. Yəni, bununla əlaqədar olaraq, belə demək mümkünsə, ciddi bir sənəd hazırlanmalıdır. 
 
– Yeri gəlmişkən, işğal olunmuş ərazilərlə bağlı qanun layihəsinin hazırlanması yönündə təkliflər səslənməkdədir. Siz bu təkliflərə necə yanaşırsınız? 
 
– Mən belə hesab edirəm ki, bu təşəbbüsü daha ciddi şəkildə qaldırmaq lazımdır. Çünki bu, artıq hüququn özünə daxil olmalıdır. Hüquqi məkana daxil olmalıdır ki, bəli, işğal olunmuş ərazilərdə işğalçı bu addımları ata bilməsin. Amma hazırda belə bir şey yoxdur. İşğalçı Azərbaycan ərazilərini işğal edib və orada istədiyi formada öz hərəkətlərinə davam edir. Eyni zamanda, bu gün beynəlxalq hüquq özü iflic vəziyyətindədir. Beynəlxalq hüququn bu gün normaları işləmir. Deməli, beynəlxalq hüququn özündə böyük bir dəyişikliklərə ehtiyac var. 
 
– Ümumiyyətlə, yaxın gələcəkdə adıçəkilən qanun hazırlana və qəbul edilə bilərmi? 
 
– Biz bu qanunun hazırlanması niyyətini bildirmişik, ortaya qoymuşuq. Bəlkə də, indiyə qədər qanunun nə qədər vacib olduğunu da hiss etməmişik. Amma artıq görürük iki, yox, onların bütün bu fəaliyyətinin qarşısını almaq üçün işğal olunmuş ərazilərin statusu ilə əlaqədar qanun qəbul etmək vaxtıdır, zamanıdır və lazımdır.  
 
KAMİL