+  -  Çap 

Bu gün “Azərbaycan Xalqı. Soyqırım Qurbanları” Muzeyinin yaradılması mövzusunda tədbir keçirilib. SİA-nın məlumatına görə, tədbirdə “Milli Qəhrəmanları Tanıtma” İctimai Birliyinin (MQTİB) sədri Elşən Məmmədov, muzeyin yaradılması ilə bağlı layihənin işçi qrupunun rəhbəri Etibar Məmmədov və təşkilatın başqa üzvləri də iştirak edib.

Tədbiri giriş sözləri ilə açan Elşən Məmmədov bildirib ki, “Azərbaycan Xalqı. Soyqırım Qurbanları” telemarafonun keçirilməsində məqsəd hər bir Azərbaycan vətəndaşının bu muzeyin yaradılmasına və fəaliyyət göstərməsinə cəlb etməkdən ibarətdir. Ermənilərin Azərbaycanda törətdikləri vəhşiliklərdən danışan E.Məmmədov deyib ki, təkcə erməni terrorçusu Andranik Ordubadda 1500 Azərbaycanlını qətlə yetirib: “XIX-XX əslərdə erməni şovinistləri azərbaycanlılara qarşı çoxlu sayda genişmiqyaslı soyqırım cinayətləri törədiblər. Bunun nəticəsində iki əsr ərzində 4 milyondan artıq azərbaycanlı həlak olub, xəsarət alıb, yurdundan didərgin düşüblər. Erməni qansızları 73 azərbaycanlı körpəsini doldurduğu borunun ağzını qaynaq edərkən içlərində erməni dlində “ana” deyən bir körpəni həmin borudan son anda azad ediblər. Bu da ermənilərin törətdiyi vəhşiliyin nümunəsidir. Lakin beynəlxalq aləmdə bu cinayətlər haqqında kifayət qədər məlumatların olmaması ucbatından, bunların beynəlxalq təşkilatlar tərəfindən qiymətləndirilməməsi göz qabağındadır”.

MQTİB-nin sədri Muzeyin Azərbaycan xalqının tapdalanmış hüquqlarının bərpası istiqamətində atılacaq mühüm addım olacağını və bu telemarafonda iştirak etməyin hər bir azərbaycanlının mənəvi borcu olduğunu vurğulayıb. Daha sonra muzeyin iş fəaliyyəti haqda məlumat verən Elşən Məmmədov telemarafonda 9 işçi qrupunun, ssenari müəllifinin olduğunu və toplanılacaq vəsait haqda ayda ən azı 3 dəfə mətbuata açıqlama veriləcəyini deyib.

Daha sonra çıxış edən layihənin işçi qrupunun rəhbəri Etibar Məmmədov bildirib ki, muzey gənclərin fikirlərində Soyqırımın aşılanmasında, keçmişimizin təbliğ olunmasında əsas rol oynayır.
Hazırladı:Turac Məmmədova