+  -  Çap 

İyulun 23-də Vəcihə Səmədova adına sərgi salonunda “İnam” Plüralizm Mərkəzinin təşkilatçılığı ilə “Ağdam Qafqaz Xirosiması və ruhlar şəhəri” adlı sərginin açılış mərasimi keçirilib.Lent.az-ın məlumatına görə, açılış mərasimində “525-ci qəzet”in baş redaktoru Rəşad Məcid çıxış edərək sərgidə Ağdamın işğaldan əvvəlki və sonrakı mənzərələri əks olunan 60-a qədər fotonun nümayiş olunduğunu bildirib.

“İnam” Plüralizm Mərkəzinin rəhbəri Vahid Qazinin sözlərinə görə, sərgi elan olunan zaman təşkilata çoxlu sayda müraciətlər və fotolar daxil olub. Həmin fotolar sırasında indiyədək göstərilməyən şəkillər də var. V. Qazi belə bir sərginin Ağdamın özündə təşkil olunması arzusunu da dilə gətirib.

Tədbirdə Prezident Yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev, millət vəkili Məlahət Həsənova və başqaları çıxış edib.

Mərasimdə “Qafqaz Xirosiması” adlı film də nümayiş olunub. Ağdamın işğaldan əvvəlki və indiki görüntüləri əks olunan foto və videolardan istifadə olunmaqla hazırlanan 8 dəqiqəlik film Azərbaycan, rus və ingilis dillərindədir. Filmin ideya müəllifi Vahid Qazidir.

Qeyd edək ki, sərgi iyulun 30-a qədər davam edəcək.

Hazırladı: Turac Məmmədova