+  -  Çap 

2010-cu il “Ekologiya ili” çərçivəsində “Təmiz Şəhər” Açıq Səhmdar Cəmiyyətinin təşkilatçılığı ilə iyulun 26-dan həyata keçirilən məktəblilər üçün “Təmiz şəhər naminə” adlı yay məktəbi başa çatıb. “Vətəndaş Cəmiyyətində Debat” İctimai Birliyinin dəstəyi ilə Quba şəhərinin Qəçrəş kəndində
keçirilmiş yay məktəbində Bakı şəhərinin 24 məktəbindən 60 məktəbli iştirak edib.
“Təmiz Şəhər”in sədri Zakir İbrahimov yay məktəbinin sonuncu günü şagirdlərlə görüşüb və ətraf mühitin mühafizəsi sahəsində görülən işlərdən danışıb. İştirakçılara tullantıların zərərsizləşdirilməsi üçün tikiləcək zavod haqqında məlumat verib.

Tədris proqramının sonunda iştirakçılar arasında tullantıların idarə edilməsi və ətraf mühitin mühafizəsi mövzusunda debat yarışları keçirilib.

Qeyd edək ki, tədbirin məqsədi yeniyetmələrin diqqətinin ətraf mühitin mühafizəsinə cəlb edilməsi və ekoloji maarifləndirilməsi, tullantıların düzgün idarə edilməsi, ekologiya sahəsində bilik və dünya görüşlərini genişləndirmək və ictimai müzakirələrin keçirilməsi olub. Layihə çərçivəsində mütəxəssislər məktəblilərə ətraf mühitin mühafizəsi, bərk tullantıların idarə olunması, zərərsizləşdirilməsi haqqında mühazirələr oxuyublar. AzərTAc

Hazırladı: İlkin Muradov