+  -  Çap 

İnsan Hüquqlarının Müdafiəsi üzrə Milli Fəaliyyət Planının (MFP) təbliği və tətbiqi vəziyyətinin monitorinqi, həmçinin seçki hüququ ilə bağlı əhalinin maarifləndirilməsi məqsədilə Xızıda ictimai dinləmələr keçirilib. Ombudsman Aparatının mətbuat xidmətindən APA-ya verilən məlumata görə, ictimai dinləmələrdə rayon icra hakimiyyəti və bələdiyyələrin, məhkəmələrin, daxili işlər orqanları və prokurorluğun, dairə seçki komissiyalarının, yerli qeyri-hökumət təşkilatları, KİV-lərin və icmaların nümayəndələri iştirak ediblər. Rayon İcra Hakimiyyətinin başçısı Vaqif Abdullayev MFP-nın qəbul olunmasının əhəmiyyətini qeyd edib, habelə vətəndaşların müraciətlərinə baxılması, qəbulların keçirilməsi haqqında məlumat verib. O, rayon sakinlərinin qaz və işıqla təmin edildiyini, cinayət hadisələrinə az rast gəlindiyini, narkomaniya ilə mübarizə aparıldığını söyləmiş, eyni zamanda rayonda hələ də su, kanalizasiya və yollarla bağlı problemlərin mövcudluğunu vurğulayıb.
Dinləmələrdə iştirak edən Ombudsman Elmira Süleymanova Azərbaycanda həyata keçirilən demokratik-hüquqi və sosial-iqtisadi islahatları müsbət dəyərləndirib, insan hüquq və azadlıqlarının dövlətin qarşısında duran ən mühüm vəzifələrdən biri olduğunu diqqətə çatdırıb.
Ombudsman qarşıdan gələn parlament seçkisi ilə bağlı seçki hüquqlarının prioritet məsələ olduğunu, Seçki Məcəlləsinə zəruri əlavə və dəyişikliklərin edildiyini, dövlət başçısının müvafiq sərəncamlarının əhəmiyyətinİ və bu sənədlərin təbliğinin zəruriliyini, eyni zamanda bütün namizədlərə bərabər imkanların yaradıldığını, seçki prosesinə müdaxilənin yolverilməzliyini vurğulayıb.

Müvəkkil səfəri çərçivəsində İşgəncələr əleyhinə Milli Preventiv Mexanizmin (MPM) funksiyalarının icrası məqsədilə Xızı Rayon Polis Şöbəsinin müvəqqəti saxlama təcridxanasına baxış keçirib, hüquq pozuntuları aşkar edilməyib, müəssisənin müvafiq standartlara uyğun olduğu müəyyən olunub.
Eyni zamanda vətəndaşların şəxsiyyət vəsiqəsi ilə təmin olunma vəziyyəti araşdırılıb və müvafiq tapşırıqlar verilib.