qhtxeber.az// Gənclər üçün Təhsil Mərkəzi (GTM) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Sosial problemlərin həllində könüllülük fəaliyyətinin inkişafı” layihəsi

çərçivəsində “Sən də könüllü ol!” maarifləndirici aksiya həyata keçirir.

Əsasən region gəncləri arasında könüllülüyün təşviq edilməsi və gücləndirilməsi məqsədilə həyata keçirilən bu aksiya gənclər arasında sosial sahələrdə könüllülük işinə maraq oyatmağı nəzərdə tutub. 

Mərkəzin direktor müavini Elnur Axundov qhtxeber.az-a bildirib ki, “Bu gün gənclərimiz müəyyən vaxt çərçivəsində könüllülük prinsipi əsasında işləyib, təcrübə qazanmağa meylli deyillər. Onlar təcrübə tələb etməyən və yaxşı məvacib verə biləcək iş axtarırlar. Bu baxımdan biz belə bir maarifləndirici aksiya keçirməklə gəncləri könüllü olaraq müxtəlif ictimai işlərdə çalışmağa səsləyirik. Çünki bu gün bizim yüzlərlə əlil gəncimizin, ahıl və kimsəsiz insanlarımızın, qaçqın və məcburi köçkünlərimizin sosial ehtiyaclarını qarşılamaq və ölkəmiz üçün əhəmiyyətli olan müxtəlif sahələrdə könüllü əməyinə ciddi ehtiyac var”.

Bu məqsədlə, Bakı şəhəri və Aran rayonlarında keçirilən aksiya çərçivəsində ictimai yerlərdə gənclərə müxtəlif maarifləndirici vəsaitlər paylanır, onlarla fərdi söhbətlər aparılır və nümunə olaraq könüllü fəaliyyətlər göstərilir.

Aksiya sosial şəbəkələrdə də yaxın günlərdə davam etdiriləcək.

Hazırladı: Turac Məmmədova