“Ermənistanın müdafiə naziri Seyran Ohanyan bizi təhvil almağa gəlmişdi, bildirdik ki, geri qayıtmaq istəmirik”. 2010-cu ilin yanvarında ailəsi ilə birlikdə Azərbaycana keçmiş Ermənistan vətəndaşı Yeğişe Gevorkyan geri dönmək niyyətində deyil və üçüncü ölkəyə getmək istəyir. 

Y. Gevorkyan APA-ya açıqlamasında işsizlik və ümidsizlikdən bezərək, həyat yoldaşı Ruzanna, övladları Alfred, Qayane və Petrosla birlikdə Azərbaycana sığındığını deyib. Hazırda onlar üçüncü ölkəyə göndərilmələrini gözləyirlər. Ruzanna “Hara olsa, getməyə hazırıq. Təki Ermənistana qayıtmayaq”, söyləyib. Y. Gevorkyan Azərbaycana qaçmaq barədə qərar qəbul etdiyi anı belə xatırlayır: “Dilənçi kökündə yaşamaqdan və doğulduğumuz, yaşadığımız şəhərdə səsvermə hüququndan məhrum edilməkdən boğaza yığılmışdıq. Yanvarın 10-da parlament seçkilərində səs vermək üçün məntəqəyə getdim. Lakin siyahıda adım yox idi. Məsələni araşdırmaq istədim. Necə ola bilər ki, bir neçə ay əvvəl mer seçkisi zamanı səs verdiyim halda, indi adım siyahıda olmur? Lakin onlar məsələni araşdırmaq əvəzinə, məni məntəqədən qovdular. Milli Təhlükəsizlik Nazirliyinə şikayət etdim, lakin məni oradan da qovdular. Evə qayıdıb sənədlərimi topladım və Azərbaycan sərhədini keçmək qərarına gəldim”.

Y. Gevorkyan Ermənistanda ayda 26 min 500 dram (60-70 dollar) gəlirlə yaşamaq məcburiyyətində qaldıqlarını söyləyib. Ruzanna isə iş tapmaq və həyat yoldaşına kömək etmək üçün dəfələrlə cəhd göstərdiyini, lakin İrəvanda iş tapmağın çox çətin olduğunu bildirib: “Bu durum məni o qədər bezdirmişdi ki, anamı, qardaşımı, evimi atıb bura gəlməyə üstünlük verdim. İrəvanda bizim günümüzdə olan ailələr çoxdur. Hamı qaçmaq üçün nəyinisə satır”.

Y. Gevorkyan avtomobillə Sədərək istiqamətindən sərhədi keçdiklərini və bu zaman erməni əsgərləri tərəfindən atəşə tutulduqlarını deyib: “Maşını bütün istiqamətlərdən atəşə tutdular. Güllə yağışı altında sərhədi keçdik. Azərbaycan tərəfdə bizi yaxşı qarşıladılar. İkinci gün qayıtmaq istəyib-istəmədiyimizi soruşdular. Ermənistanın müdafiə naziri Seyran Ohanyan bizi təhvil almağa gəlmişdi. Lakin o zaman da söylədik, indi də təkrarlayıram ki, geri dönmək istəmirik. Parlament buraxılmayınca, prezident dəyişməyincə Ermənistanda vəziyyət düzəlməyəcək. Bizim prezident xalq tərəfindən seçilməyib. Seçilmiş olsaydı, insanlar niyə etiraz mitinqləri keçirirdi? Oturub insanlarla danışmaq əvəzinə, onları dağıtdı. Təcridxanalar ağzına qədər dolu idi. On nəfərlik kameralara 16-18 adam doldurmuşdurlar”.

Ermənilərin Dağlıq Qarabağ münaqişəsi və azərbaycanlılara münasibətindən danışan Y. Gevorkyan ermənilərin müharibədən yorulduğunu söyləyib: “İrəvan erməniləri sülh tərəfdarıdır. Lakin prezident kompromislərə getmir və yalnız öz kreslosunu düşünür. Azərbaycanlılara münasibət ümumən normaldır. Mənim yaşadığım yerdə - şəhərin mərkəzində Nərimanov küçəsi vardı. Çoxlu azərbaycanlı yaşayırdı. Mən onlarla birlikdə böyümüşəm. Müharibəyə isə getmədim. Əlimə silah götürüb insanları öldürmək istəmədim”.