+  -  Çap 

Böyük Britaniyanın British Council təşkilatı Ümidli Gələcək Gənclər Təşkilatının tərəfdaşlığı və Azərbaycanın Gənclər və İdman Nazirliyinin dəstəyi ilə “Fəal Vətəndaşlar” proqramını elan etmişdir. Layihə çərçivəsində mədəniyyətlərarası dialoq, bərabərlik, qlobal icma sistemlərinin tərtibi və həyata keçirilməsi mövzusunda təlimlərin keçirilməsi nəzərdə tutulmuşdur.
British Councildən AzərTAc-a bildirmişlər ki, proqram daxilində ilk təlim Azərbaycanda gənclərlə işləyən təşkilatlar üçün açıq elan olunmuşdur. Təlimlər 2010-cu ilin oktyabrından başlayacaqdır. Nəzərdə tutulan tədbirlər Azərbaycanın müxtəlif bölgələrində dekabra kimi davam edəcəkdir. Layihə Azərbaycanın şəhər və rayonlarının inkişafında fəal rol oynayan 18-35 yaşlı gəncləri cəlb edəcəkdir. Təlimdən sonra “Fəal Vətəndaşlar” proqramının təlimçiləri mədəniyyətlərarası dialoq və qlobal vətəndaşlığı təbliğ edərək öz layihələrinin tərtib edilməsi və həyata keçirilməsi üçün icmalarından olan iştirakçılara təlimlər keçəcəklər.