+  -  Çap 

qhtxeber.az// Qəbələ rayonunda Birləşmiş Millətlər Təşkilatının Qaçqınlar üzrə Ali Komissarlığının Azərbaycan ofisinin maliyyə dəstəyi ilə Qəbələ Regional QHT-lərin Resurs və Təlim Mərkəzi Qəbələ rayonunda məskunlaşmış məcburi köçkünlər üçün “İcmalarda Texnologiyalardan İstifadə İmkanları” layihəsinin açılış mərasimini həyata keçirib.

Açılış mərasimini giriş sözü ilə açan Qəbələ Regional QHT-lərin Resurs və Təlim Mərkəzinin direktoru Qalib Nəbiyev layihə haqqında məlumat verib. O, yeni layihə çərçivəsində hər ay mərkəzdə 50-dən artıq gəncin kompüter biliyi, ən müasir səviyyədə texnologiyadan istifadə imkanları əldə edə biləcəyi barədə söhbət açıb.

Nəbiyev layihə çərçivəsində biliklər əldə edəcək məcburi köçkünlərin yeni iş əldə etmək imkanlarından, Birləşmiş Millətlər Təşkilatının Qaçqınlar üzrə Ali Komissarlığının Azərbaycan ofisinin 2003-cü ildən regiondakı fəaliyyətindən, məcburi köçkünlərə verilən qeyri-ərzaq yardımının əhəmiyyətindən və birgə əməkdaşlıq çərçivəsində həyata keçirilən aksiyaların əhəmiyyətindən danışıb. O, bu fəaliyyətə görə Birləşmiş Millətlər Təşkilatının Qaçqınlar üzrə Ali Komissarlığının Azərbaycan ofisinin rəhbərliyinə təşəkkürünü bildirib.


Tədbirdə rayon icra hakimiyyətinin ictimai təşkilatlar və siyasi partiyalarla iş şöbəsinin müdiri Qüdrət Səmədov, rayon icra hakimiyyətinin mülki müdafiə şöbəsinin müdiri, qaçqınlar üzrə təlimatçısı Tahir Hacıyev, Birləşmiş Millətlər Təşkilatının Qaçqınlar üzrə Ali Komissarlığının Azərbaycan ofisinin rəsmisi Ahmad Calal Sahabzada çıxış ediblər.

Layihə ilə tanışlıqdan sonra Birləşmiş Millətlər Təşkilatının Qaçqınlar üzrə Ali Komissarlığının Azərbaycan ofisinin nümayəndələri qeyri-ərzaq yardımının paylanışını müşahidə etmək üçün paylanış yerinə baş çəkiblər. Paylanış yerində olan məcburi köçkünlər bu fəaliyyətə görə qonaqlara öz minnətdarlıqlarını bildiriblər.