+  -  Çap 

qhtxeber.az// “Yaddaş” Maarifçi Gənclər İctimai Birliyi tərəfindən “Fotojurnalistika vasitəsilə gənclərin vətəndaş iştirakçılığı” adlı layihə çərçivəsində Zaqatalada Balakən, Zaqatala və Qax rayonlarından olan 15-20 yaş arası 15 nəfər gənc üçün 4 günlük təlim həyata keçirilib. Bu barədə qhtxeber.az-a “Yaddaş” Maarifçi Gənclər İctimai Birliyinin sədri İlqar İlyaslı məlumat verib. Onun sözlərinə görə, təlim zamanı gənclərə fotojurnalistikanın əsasları, fotoqurğulardan düzgün istifadənin yolları, fotolayihə üçün mövzu seçimi, ərazinin müəyyənləşdirilməsi və s. haqda məlumatlar verilib. Təcrübəli trener tərəfindən fotojurnalistika sahəsində təqdim edilən materiallar əsasında iştirakçıların əldə etdikləri biliklər təcrübi məşğələlər zamanı daha da gücləndirilib.
QHT sədri deyib ki, bundan başqa iştirakçılara gələcəkdə hazırlayacaqları fotolayihələri ictimaiyyətin diqqətinə çatdıra bilmələri üçün fərdi bloqların yaradılması və idarə olunması sahəsində də bilik və bacarıqlar verilib. Nəticə olaraq iştirakçıların 80 %-i artıq öz bloqlarını yaradır, bloqların tanıdılması istiqamətində işlər aparırlar.
Qeyd edək ki, layihə Demokratiya Komissiyası Kiçik Qrantlar Proqramı tərəfindən maliyyələşdirilir və 6 ay müddətində həyata keçiriləcək.