+  -  Çap 

qhtxeber.az// 31 mart - Azərbaycanlıların Soyqırım Günü ilə əlaqədar Türkiyənin Iğdır şəhərində böyük bir konfrans keçirilib. Türkiyə Azərbaycan Dərnəyi (TAD) və Türkiyə Beynəlxalq Əlaqələr və Strateji Analizlər Mərkəzinin (TÜRKSAM) təşkilatçılığı və İğdır şəhər valisinin dəstəyi ilə keçirilən konfranda Azərbaycan millət vəkilləri də iştirak edib. Qhtxeber.az-ın məlumatına görə, Türkiyədə səfərdə olan millət vəkilləri Fəttah Heydərov, Azay Quliyev, Qənirə Paşayeva, Musa Qasımlı və Fazıl Mustafa öncə soyqırım muzeyində olub, İğdırda Heydər Əliyevin və Atatürkün büstlərini ziyarət ediblər. "Iğdır və bölgədə Azərbaycan türklərinə qarşı soyqırımlar və erməni iddiaları" mövzusunda keçirilən konfransda TÜRKSAM və TAD sədri Sinan Oğan çıxış edərək Azərbaycanın haqlı iddiasında göstərdiyi səyləri təqdirlə qarşıladıqlarını bildirib. O deyib: “Bu Şəhid Türklər abidə və muzeyini yıxmaq istəyənlər var. Lakin iğdırlılar buna icazə verməyəcək. Buranı yıxmaq tarixi yıxmaq deməkdir”.
Konfransda deputat Fəttah Heydərov Türkiyə və bütün dünyaya səslənib: “Türkiyə və bütün dünyaya ermənilərin bu vəhşiliklərinə dayan deməlidirlər ki, yeni vəhşiliklər edilməsin, yeni qan tökülməsin, insanlar ölməsin". Soyqırıma həsr olunan tədbirlərdə çıxış edən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, millət vəkili Azay Quliyev isə yalnız keçmişdə bizə qarşı edilən soyqırımları xatırlamaqla kifayətlənməyib, bundan sonra edilməsi lazım olan işlər üzərində dayanıb. O, Azərbaycanın bu istiqamətdə görülən işlərə verdiyi əhəmiyyətdən danışıb. A.Quliyev Ermənistandakı Metsamor Atom Elektrik Stansiyasının bölgə üçün böyük təhlükə olduğunu, buna görə də onun bağlanmasının zəruriliyini vurğulayıb. A. Quliyev xüsusi ilə Yaponiyadakı baş verən məlum hadisədən sonra belə bir qəzalı vəziyyətdə olan Atom Elektrik Stansiyasının fəaliyyətinin dayandırılmasında dünya ictimaiyyətinin maraqlı olmasının vacibliyini önə çəkib.